Народнае апытанне працягвае вывучаць, што прыхільнікі пратэсту думаю пра вайну ва Украіне. Ніжэй некаторыя вынікі апытання, якое праводзілася ў траўні 2022 года.
- Беларусы, якія падтрымліваюць пратэст, у большасці выступаюць за падтрымку Украіны без уступлення ў вайну (50%).
- Рэспандэнты ўсё больш упэўненыя ў перамозе Украіны. У красавіку так лічылі 69%, у траўні – 79%.
- Галоўнымі наступствамі вайны беларусы бачаць пагаршэнне ўзроўню жыцця (75%), новыя санкцыі заходніх краін (63%) і вялікую хвалю міграцыі з Беларусі (35%). Аднак зменшылася асцярога таго, што Беларусь страціць суверэнітэт (з 49% да 28%).
Стаўленне да беларусаў
Мы запыталіся ўдзельнікаў апытання, як да беларусаў ставяцца ў іншых краінах. 38% думаюць, што беларусаў лічаць ахвярамі рэжыму, 25% – агрэсарамі, 62% упэўненыя, што існуе падзел на народ і ўладу.
Большасць (76%) лічыць, што беларусы не заслугоўваюць такога ж негатыўнага стаўлення Заходніх краін, як расіяне. 50% упэўнены, што беларусы не вінаватыя ў тым, што з тэрыторыі Беларусі здзяйсняліся ваенныя дзеянні.
Цікава, што зменшылася колькасць рэспандэнтаў, якія лічаць, што стаўленне ўкраінцаў да беларусаў пагоршыцца. Калі ў сакавіку 50% лічылі, што ўкраінцы будуць ставіцца да беларусаў як да ворагаў, то зараз так думаюць 14% рэспандэнтаў.